Durchleüchtiger Cuhrfürst, mein herzallerlibster herrh bruder Mitt diser gutten gelegenheit des GravG Hamilton hab ich nit vnterlaßen wollen, ihne mit disen wehnigen zeilen zue reccomendiren in dero Liebden bestendige genad, in dem er sich hier sehr beflißen hatt, dero Liebden in allem eifrigst zue dienen. Wans nuhr wehr acceptirt worden, hatt er auch offerirt gehab, gelt gleich herzueschißen, aber man hatt iezt bey der cammer es nit acceptiren können, weil man nit hatt wißen zue versichern. Er wirts dero Liebden schon alles selbsten berichten.

Sie wehren ehender kommen, dero Liebden zue bedienen, aber ihre gesuntheit hatt es nitt zuegelaßen, hatt ein cur gebraucht, iezt, hoff ich, werd sie wider woll dienen können. Weil die reis langsamb gehn wirt, so werde mit der post dero Liebden liebste schreiben beantworten. Due mich dero Liebden befehlen vndt werde sterben dero Liebden getrewste schwester Eleonora Fauorita den 18ten august 1696 Dero Liebden werden von ihme alles vernemmen, was hir passirt, absonderlich mein trewe lieb dero Liebden versichern können, vndt das selbe so bestendig, das woll kein mensch in der welt capabel wirt sein, solche zu schwechen.